«Пай, пай, шіркін қазақтың дәстүрлері- ай!»

ҚБ «Западный» кітапханасында Елбасымыз Н. Ә. Назарбаевтың «Болашаққа бағдар: рухани жаңғыру» мақаласын негізге ала отырып «Жаңғырудың қамы – жасампаздықтың салты» жобасын іске асыру мақсатында іс-шара өткізілді. Қызылорда қаласының ІІІ интернационал кітапханасымен «Пай, пай, шіркін қазақтың дәстүрлері- ай!» тақырыбында бейне көпір арқылы этнографиялық сағат ұйымдастырылды. Мақсатымыз жас ұрпақтың бойына ұлттық құндылықтарымызды сіңіріп, салт - дәстүрімізді білуге тәрбиелеу. «Біз жастардың бойына ұлттық тәрбиені сіңіріп, үлкенді сыйлауға, Отанды сүюге, адамгершілікке тәрбиелеуіміз керек. Жастарымызды кітап оқуға, заманауи білім алуға баулып, қазіргі заманғы озық технологияларды меңгеруге шақыруға тиіспіз. Сол себептен, біз өзіміздің салт-дәстүрімізге, ұстанған әдет-ғұрыптарымызға дұрыс көзқараста болуымыз керек», - деді кітапханашы. № 6, 17 мектеп оқушылары «Сүйінші», «Қамшы ілу», «Сәукеле кигізу», «Бесікке салу» салт-дәстүрлерінен көрініс көрсетті. Оқырмандарға викториналық сұрақтар қойылып, жауаптар тыңдалды. Мерекелік ән шашу ретінде КПК колледжнің І курс студенті Өмірзақов Арман «Адай» күйін орындады. Іс шара соңында онлайн үйлестірушісі, Қызылорда кітапханасының кітапханашысы Тұрманова Римма Қалдыбекқызына сөз берілді. Кызылорда кітапханасының оқырмандары қазақ халқының әндерін орындады, және М. Макатаевтың өлендерін оқыды.

Ал біздің кітапханамызда мерекелік дастархан жайылып, қазақтың ұлттық тағамы «Қымыз» ұсынылды. Мереке соңында Қыдыр ата балаларға бата берді. Халқымыздың ғасырлар бойы жасап кеткен тарихы — бүгінгі ұрпақ үшін баға жетпес үлкен қазына, мұра. Бұл мұраларымыз имандылық, ғибраттық, әдет-ғұрпымен, салт-дәстүрімен қымбат. Осынау ұрпақ тәрбиесінің қымбат қазынасын мұралыққа алған біздер оның ішіне үңіліп, одан өз болмысымызға керек-жарақтарымызды алуға тиіспіз.